韓國第一大美人金喜善近日憑JTBC熱播劇《有品位的她》而人氣急升，日前擔任綜藝節目《我家的熊孩子》嘉賓時，獲演出節目嘅媽媽們大讚佢真人靚過上鏡。而金喜善亦冇收收埋埋，咩都公開晒嚟講，率真性格吸引節目收視率急升至19.2%，足足比上星期一集高咗3.1%，可見金喜善嘅魅力。

金喜善於節目中自爆陀B時重到180磅：「當年懷孕時一日食8餐，所以肥咗好多，不過因為餵母乳嘅話就好自然減到肥，所以都算瘦得快。」金喜善續指：「但如果BB唔食母乳，我需要泵出剩低嘅母乳，有時會唔小心噴到天花板。」完全唔理現場有男士，大方公開做媽咪後嘅事，搞到男嘉實之一嘅徐章勳勁怕醜。

同時，金喜善又喺節目上畀媽媽級粉絲催生第二胎，金喜善坦言依家已經40歲，感覺力不從心懷上第二胎，點知媽媽們反指：「邊會啊，50歲都得喇！」金喜善就回覆表示「咁我今晚開始試試」，引起在場人士爆笑。