新一屆立法會冇咗堅實ABC自由黨田北俊，花生友少咗好多趣味，但告別立法會嘅田少依然舉動頻頻，除咗打理生意，亦繼續喺政圈打滾，包括喺選舉委員會商界一再戰，希望喺小圈子內攞到一票，選出有料到嘅特首。
估唔到佢最近仲搞搞新意思，處男下海幫PlayStation拍廣告；佢喺廣告入面仲好型仔，着西裝攞住電話做Big Boss，揮拳將有樂壇小強之稱嘅阮民安Tommy打低，再輕輕同徐天佑講咗句：「唔好意思，打搞晒！」跟住翩然而去。
雖然呢段7分鐘嘅廣告，田少戲份得15秒，但都好搶眼，風頭蓋過廣告主角！網民留言大讚佢表現好正，有人提議佢轉行殺入娛樂圈，唔知田少會唔會順應網民意見，試吓喺演藝界發圍！

自爆掛住笑頻NG

條片反應唔錯，田少都好開心，笑指呢次下海冇錢收，估唔到出鏡得嗰幾秒，自嘲變咗大大個茄喱啡。田少笑稱，拍攝時NG咗好多次，皆因對方打落嚟時，佢就掛住笑，到佢打人時又唔夠力。唔知各大電視台會唔會搵田少閒時客串助陣，谷下收視呢？

李八方
mailto:[email protected]