胡楓早前患老年黃斑病變 笑言治療後睇女仔仲清楚
蘋果日報 2020/09/17 10:41
胡楓
胡楓曾患老年黃斑病變，早前已接受治療。
胡楓（修哥）今日以健康教育大使到金鐘出席「老年黃斑病變」宣傳活動，會上他分享曾接受老年黃斑病變治療：「若干年前發現自己睇啲大廈彎彎曲曲，去醫生度檢查發現有老年黃斑病變。嗰時聽到話喺隻眼打針好驚，後來知道最嚴重會盲咪仲弊，所以去做，原來唔痛嘅，會有少少麻醉。」修哥笑謂現時更精靈，自己駕駛及睇靚女更清楚：「不過疫情嗰陣我冇出去，都係啲孫女嚟探我，我先有機會見到靚女。」
修哥透露已在眼底打3針，接受了基本療程，但為了效果更好，會繼續定期打針。問他平日有否定期驗身？修哥聞言即哈哈大笑說：「講起body check，真係我好大嘅禮物，全部數字都好靚、非常滿意。」原定5月舉行紅館演唱會，修哥表示已延期，預計明年6月開，他笑指明年以89歲高齡開個唱是紀錄。他指與無綫仍有合約，但由於疫情關係已休息近9個月，自己亦期待開工。
至於，有否探望好友李香琴？修哥說：「好耐好耐之前探佢，已經唔認得我。老人痴呆真係非常危險，所以要去應酬下、見下人。」記者指琴姐患病前亦一直有工作，修哥嘆口氣說：「佢之前跌過嘛，我都叫佢唔好接咁多嘢，佢唔聽，鍾意工作都要錫住自己身體。」另外，譚炳文將於21日舉殯，修哥表示會到場致祭：「6、70年朋友，我會去，上一次見係幾個月前，不過我一直都有托佢個女問候佢。」
胡楓表示與譚炳文相識70載，月底會出席對方葬禮。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！