兩屆法國冠軍騎師布達德，下周一2018年元旦日就會開始在港上陣，客串至2月25日賽事。

布達德本月6日在快活谷國際騎師錦標賽贏出「紅運發財」，令馬迷留下好印象，就連目前正喺外地放假嘅練馬師告東尼，對呢位25歲年輕騎師都有好感，在元旦日重頭戲1400米三級賽華商會挑戰盃，原來已book定布達德騎「大印銀紙」。

「大印銀紙」自前季捧走董事盃後，表現就走晒樣，直至喺一班1400米跑第三，終於復現競爭力，今場柏寶要騎「詠彩繽紛」，布達德因而獲得「大印銀紙」帥權。

由於布達德向馬會報稱最低出賽造磅為123磅，但「大印銀紙」今場只負122磅，而按例120磅或以上馬匹不可超磅，故布達德若減不到磅，便不可上陣，是變數所在，不過只須減一磅，相信問題不大。

同日布達德還book定告東尼之「帝豪寶寶」、賀賢馬房「馬到成功」同沈集成的「飛越峰」上陣。