十月八日，星期三，天氣晴。

呢幾日返工冇厘神氣（其實都好幾年），日日望住本存摺同稅單，真係食催淚彈都冇咁多眼淚。最慶係佢老闆（即係我老闆）糧又唔出，但就坐艇出海風流快活，完全當我哋班員工奴隸都不如。搭車返大埔，途中撞見同事威仔，斷估佢同我一樣，都係啱啱去完勞工處。

「喪標，唔使咁愁噃，乜你冇收到公司email咩？」
「咪玩啦六合威，公司email全部係維穩訊息，邊個會得閒checko架？」
洋洋得意的威仔向我展示《亞洲電視致員工信件.doc》，水蛇春文章重點其實得六粒字——洽談股權出讓。
「仆街，亞視嚟個喎，接亞視業務仲慘過接胡椒噴霧。」
「聽聞金主姓楊o架。咪話唔教精你，陣間返去同葉總開會，記得搵啲屎橋袋住先，咪到時好似張融咁鳩嗚。」

喪標我做咗咁多年節目策劃，終於唔使再度埋啲乜嘢《高志森微博》、《亞洲政策組》，淨係班英皇星都夠撼CCTVB啦，呢鋪收視仲唔六四開？拿拿聲開worddocument，草擬一堆亞視節目。

《模擬電視節目表.doc》

（一）重頭劇
《我和殭屍有個約會4之愛國無罪》
主演：杜汶澤、溫兆倫、黃秋生
尹天照寸過亞視，都好難搵佢做返主角，況天佑由杜汶澤代住先，大反派非愛國溫莫屬（杜汶澤同溫兆倫角色可互調，視乎亞視立場）。內容梗係講述hit爆的中港話題啦，成日話「人多，殭屍係怪物；殭屍多，人就係怪物。」咁邊個扮殭屍邊個扮人，咪又係視乎你班高層立場囉，希望到時秋生仲可以演出啦。

（二）資訊節目
《EEG焦點》
主持：Mani　記者：古巨基
《ATV焦點》成日公器私用，真係膠都費事畀。放心，《EEG焦點》絕對唔會，不過節目顧名思義，焦點當然係英皇星為主，由Mani主持不作他選。至於負責扑咪嘅，當然係經驗豐富嘅基仔啦。

（三）清談節目
《王芝鋒微博》
主持：謝霆鋒
相信好多人都刮緊黃之鋒個微博，特別係藍絲帶嗰批，所以《王芝鋒微博》可以呃得吓人。之不過王芝鋒當然唔係黃之鋒個黃之鋒，係王菲、栢芝同霆鋒，而世上亦只有霆鋒做到主持，同邀請到兩位天后級嘉賓對談。

（四）娛樂節目
《立立洗衣液特約：立立怪談》
主持：洪卓立
o依家人人都cut到有線，亞視都可以雄霸靈異節目，但主持一定要由洪卓立做先至夠氣氛。btw，立立識得講人話，邊似得某啲奴才偽人對人講鬼話，生不如死？

（五）飲食節目
《天真識食》
主持：鍾欣桐、蔡卓妍
飲食節目本應由霆鋒主持，但霆鋒要食十幾道鋒味同主持《王芝鋒微博》（同埋打機），睇怕都冇時間。其實Twins一樣食盡山珍海錯，由佢兩位介紹都冇問題。

（六）旅遊節目
《向中國出發》
主持：張敬軒
香港人真係唔可以冇咗亞視。《人民日報》成日派死亡之吻，向強國人介紹西貢同南丫島，我哋點可以唔還以顏色先？《向中國出發》就係推介返中國名勝，仲可以植入廣告，大賺一筆。

（七）慈善節目
《歡樂滿中華》
表演嘉賓：Yumiko、英皇群星
至於慈善節目，人哋CCTVB有《歡樂滿東華》，我哋夠有《歡樂滿中華》，喺全中國播出，共襄善舉，空中飛人環節固然唔少得。

（八）音樂節目
《亞洲好聲音》
評判：巫啟賢　歌手：吳浩康、陳偉霆
《亞洲好聲音》其實即係英皇新人歌唱大賽真人騷版，換湯不換藥，慳水慳力。

（九）攝時間節目
《容祖兒演唱會2046》、《林峯LetsGetRed演唱會》
大家都知亞視要啲無限loop嘅節目啦，單係容祖兒演唱會，就夠loop到2046，而將林峯letsgetwet演唱會重新pack一pack，可以唱紅添，正呀。

四點半，夠鐘開會。杜秋棠突然whatsapp我，叫我send篇日記畀佢當功課交，希望條衰仔唔好開我名。

撰文：杜秋棠＠抽水站
https://www.fb.com/freakingwestlook