近日香港乍寒還暖，一個唔覺意隨時中招患上傷風感冒。日本女歌手西野加奈日前就分享心得，佢話有樣嘢食咗會增強抵抗力，10年一直冇染上感冒都係多得呢種食物，究竟係乜？登登燈凳....就係咖喱喇！

西野加奈近日上電台節目宣傳兩張精選碟時，被問到有冇邊款食物有助增強能量，佢就好權威咁話：「就是吃咖喱！我好喜歡咖喱，過去10年都沒有感冒，我認為是多得咖喱呢！」其實近年醫學界研究指出，咖喱含有薑黃素（curcumin），有預防感冒、治療癌症及延緩老人癡呆症狀嘅神奇功效，又可以促進血液循環，達到排汗減肥效果，咁當然食得多都一樣致肥啦！

西野加奈已登上樂壇天后寶座，年底所有音樂盛會都定必有佢份，除再次出戰《紅白歌唱大賽》外，仲有《日本唱片大賞》、《日本有線大賞》同埋《FNS歌謠祭》等都會例牌出席。而西野加奈兩張精選碟《SecretCollection~Green~》、《SecretCollection~Red~》，推出即同時打入oricon大碟榜三甲，計埋西野前年嘅《LoveCollection~mint~》、《LoveCollection~pink~》，佢已累積同時有兩碟打入銷量榜三甲嘅三星期記錄，係繼已故歌手藤圭子、樂壇前輩濱崎步之後，樂壇史上第三人。