到陸羽飲茶,史丹頓街既已狹窄,向上環方向嘅右邊又泊滿車兼有貨車收緊垃圾,條路更加窄。因行人眾多,尊貴的議員行在馬路上,邊行邊講電話,左丁山嗌住佢:「因住車親呀!」尊貴議員話:「咁易咩。」收咗線,捉住左丁山講幾句,急忙捉住佢走入橫巷口,否則我哋既阻街,又阻車,實俾人鬧。
議員真係開口就鬧,不過係鬧件巴士票價可加可減機制,大嗌搵笨,話廖秀冬思路不清,其中一項最明顯嘅就係「歧視現金」。何解?二○○六年一月一日起,長途巴士費會減價,單程車費為十元至十四點九元者,減5%,十五元以上者,減15%,但有一個條件,就係畀車費(一)要預付,(二)用八達通先至有憑證。換言之,你唔用八達通,只有現金,對唔住,冇減價優惠。議員話:「雖然人人有八達通,但偏偏我冇,或者唔記得帶出街,咁就冇減價優惠,唔係歧視,係乜嘢!」理論上係嘅,不過冬姑只想盡快推出可加可減機制,歧視現金客!唔理得咁多咯。
想要優惠,必先預繳,對並非定點來回嘅老友,好易得不償失,譬如四日之內搭巴士,車費十五元,用八達通付車費,每早上巴士一嘟預付,唔見三十元,四日就一百二十,偏偏在第四日臨放工,畀老闆叫你去中環見客,而你搭嘅巴士係由鰂魚涌過紅隧,你到時見客後,走返去鰂魚涌搭巴士吖,還是由中環搭地鐵返屋企?唔返去鰂魚涌,你就平白唔見咗十五蚊(預付咗)巴士費,幾激氣呢!反而巴士公司就會講句多謝,唔覺意賺多咗㖭!
巴士公司願意長途車減價,短途唔肯減價,旨在加強競爭力,與東鐵西鐵地鐵爭奪新界乘客,熊永達教授講西鐵唔聲唔聲,透過優惠,減價幾成,搶走唔少九巴客,西鐵乘客由每日六萬人升至十九萬人。由此可見,有競爭就會減價,冇競爭就話知你啦。