目前有四位練馬師仲未贏夠15場，但其中霍利時獎金夠1,500萬，尚欠一WIN便可達標上岸，餘下14次賽事肯定盡力爭取頭馬。今期時廐有足夠籌碼爭勝，其中第五場「越感」吼得過。

第五場三班1000米，「越感」今季取得兩冠一亞兩季，2月3日贏谷草1200米，直路衝贏之後三WIN的「光芒再現」，孭重九磅而贏佢一個半馬位，照計實力至少值二班尾。上仗戴眼罩跑田草1200米，前中段搶住走，鞍上人田泰安卻大力拉實，出現人馬角力情況，兼且當日在滂沱大雨之下，走內欄不利場地，最後二百米走勢無以為繼。今場繼續戴眼罩上陣，縮程跑1000米鬥快啱數，換雷景勳不能輕視。

同場「勝利寶石」近期體重不斷上升，短途馬身形變大隻，能力亦有提升，縱使評分處高位，也有贏馬本錢。「天心星」上季74分輸短馬頭，跑短途的實力值三班頂，現時70分仍然有利，上場排11檔贏馬，今場排二檔更加惡。「忠心義氣」上場在四班最後百幾已穩操勝券，取勝姿態似難實易，升班而孭少11磅，仍有條件入圍。