上任政務司司長後，民望繼續插水嘅林瑞麟，噚日出席立法會特別內務委員會，回答議員有關「十二五」規劃問題，話說長毛今次冇喺會上向林公公掟蕉，只係問林瑞麟知唔知幾多位立法會議員兼任全國人大代表，主持會議嘅自由黨主席劉健儀護主心切，一度質疑條問題離題，點知長毛轉數快，話全國人大代表負責監察同制訂「十二五」計劃，林公公要服侍呢班人，好應該知有幾多個。
林公公見避無可避，先死撐自己今次係講內地事務，唔係參加長毛答問比賽，但最後都答長毛話係4個，點知長毛即場踢爆佢唔熟書，因為答案係5個！之後長毛再質問佢，有幾多位立會議員身兼全國政協，林公公今次醒咗，只答「有好幾位」，長毛立即開古話係6個，不過今次連佢自己都搞錯，正確答案應該有9個。身兼全國政協嘅林大輝好唔高興，話長毛為乜數漏佢，仲即場向長毛派印有全國政協銜頭嘅卡片，以示「抗議」咁話。