袁詠儀（靚靚）、余安安、馬詩慧、Rosemary同埋傅嘉莉，今日喺中環出席YSL活動，靚靚嘅囝囝魔童啱啱接受咗「冰桶挑戰」，靚靚笑言：「我哋一家三口人緣好，所以都受到挑戰，但屋企得十幾粒冰，老竇（張智霖）又喺沙漠，冇理由等佢返黎，阿仔嘅同學拍片比佢，佢即刻好有興致要試。」

靚靚話都有解釋比囝囝聽，記住淋水落頭感覺，有呢個病嘅人肌肉就有呢個問題，問靚靚點解唔陪囝囝？佢繼續笑話：「屋企唔夠冰嘛，佢做代表，勇字行頭。」

靚靚於9月4號生日，佢話仲諗緊陪大仔（指老公）定細仔（魔童），因為老公到時喺英國拍戲，但細仔最近又好黐身，要同佢攬攬又要錫錫，或者陪完個大再陪細。

講到張智霖話靚靚如果去英國，可以瘋狂shopping，靚靚指老公拍戲地方，同巴黎購物地方要兩個鐘頭車程，所以可能未必過去，冇理由去到又唔陪佢，或者10月、11月再同蔡一智太太、伍詠薇再去。

有指張智霖送過百萬車比佢做生日禮物，靚靚話冇，自己都唔鍾意車，佢話男人離不開呢樣嘢，鍾意車又有能力，都可以滿足下自己，佢話：「好似我都鍾意狂買嘢，如果唔比佢買就唔公平。」講到張智霖今個月27號生日，佢話：「我知佢鍾意唱歌，會買一支咪送比佢，等佢喺台上拎住我支咪唱歌，支咪都要成十幾萬。」

傅嘉莉話出席完活動都會接受冰桶挑戰，仲要着番0依家套衫，佢話最近隻腳好似俾蝨咬，有3粒，其中一粒有五蚊咁大，已經睇咗醫生，可能抵抗力差，所以最近要穿長褲或長裙，希望快點護理好，迎接之後半年工作。