丹楓（271）單計手頭豪宅價值，幾乎相當於集團本身市值嘅兩倍，丹楓落後低殘，抵搞。丹楓透過聯營揸咗大潭紅山半島樓面面積17萬方呎。香江豪宅市道火熱，係咁易以每方呎1.3萬元計數，丹楓單係紅山半島嘅價值，已經高達22億元。呢個數額，仲係未計埋尖沙嘴港晶中心及香港仔港灣工貿中心等等資產。單一物業市值，已經遠超集團本身市值12億元，丹楓殘到痹。又以丹楓今年6月底嘅投資物業及聯營公司賬面值24.4億元做參考，又係係咁易重估多30%，資產額外增值7.3億元，相當丹楓每股0.587元，丹楓現價不過0.99元，相對重秤後NAV每股2.87元，大幅折讓66%。而呢轉好多本地磚頭股，已經創1年或3年高位，折讓亦再無好似丹楓咁吸引，博丹楓翻半番到1.48元，折讓仲高達50%。

渝港炒點多看升兩成

渝港（613）最新NAV每股0.25元，現價8.3仙，折讓近67%，又係另一隻大折讓兼大落後嘅磚頭股。又啱上星期尾，官府方面話，喺下個月公佈過海隧道分流研究報告，會比較唔同方案及可行性，當中，唔排除回購東、西隧。家陣渝港透過旗下港通（032）揸住西隧部份權益，市場開始有noise，渝港亦有多個point炒。呢轉先博渝港升20%到9.96仙，折讓仍高企60%。
錢雋