因為疑似裸照風波而被釘牌嘅「法律超人」謝偉俊Paul，積極部署出選立法會旅遊界，因此密切注視界內風吹草動，對於最強對手、香港旅遊業議會總幹事董耀中一舉一動十分緊張，噚日佢主動向傳媒報料，指董耀中已經以「私人理由」向議會請假兩個半月。

疑休假期間參選

董耀中請長假，所為何事畫公仔唔使畫出腸，阿Paul指董耀中係法定機構嘅公職人員，用呢個身份參選，可能涉嫌濫用職權，有違選舉公平原則，阿Paul稱已去信議會，要求理事會今日開會時，研究董耀中休假參選有冇問題。
董耀中向八方證實，早前以「私人理由」向議會申請休假，由7月1日起至9月15日止，雖則係人都知董耀中「休假」期間會做乜，不過佢堅稱仲未有參選決定，更反駁謝偉俊指議會主席何栢霆幫手拉票之說，事關佢都未宣佈參選，又何來搵人幫手拉票呢？佢話多謝謝偉俊關心，如果有消息，一定向外公佈。放長假唔係參選，董耀中唔通係去旅行？暑假係旺季，如果有筍團，記得通知聲喎！