音樂人黎小田徒弟，來自北京嘅女歌手崔子格，今日到新城宣傳專輯《裝睡的人》，竟然係一張廣東歌EP，佢話用咗五年時間去學廣東話：「因為自小就很喜歡香港電影及音樂，從小就聽梅艷芳張國榮的歌，最喜歡他們的《胭脂扣》。」 佢話廣東話比佢想像中難學，目前程度只能夠錄到歌，對話仍然有困難。

近年本地廣東歌市場愈來愈細，好多本地歌手都選擇錄國語歌，偏偏來自北京嘅佢會選擇錄廣東歌？佢話：「粵語對我嚟講有一種情意，尤其是現在內地越來越少機會聽到粵語，我有一些內地歌迷年齡大約13至18歲，他們幾乎不認識粵語，亦不知道粵語歌曾經有輝煌年代，所以我希望將粵語帶給他們認識。」

崔子格話做呢隻碟唔係想出名亦冇諗賺錢，只希望幫手推廣，好彩EP喺北京反應唔錯：「可能是他們聽不懂，所以更喜歡吧。」

精選娛聞，喺晒《娛果》
http://fb.com/appledailyent