陳小春同個仔Jasper，上年拍完《爸爸去哪兒5》，遇上中共十九大會議，當時湖南省委巡視組提交報告指湖南衛視長期以「娛樂立台」，而《爸爸》系列過度消費明星、明星子女，甚至傳出一年內唔會播出。結果係…《爸爸5》由電視轉咗形式到網上播，成功過骨。

節目收得梗係再添食，陳小春同Jasper今年再參加《爸爸6》，而優酷就「參考」咗《爸爸》呢個構思，搵咗黃貫中同女兒黃鶯等，拍咗個節目叫《想想辦法吧！爸爸》，不過早前就接連宣佈話要「調整」，臨時抽起唔播得。（新聞連結： https://bit.ly/2Bevm1H ）

要「調整」啲咩…有答案喇。前日大陸嘅廣電總局話要公開徵求意見，發佈咗一份「未成年人節目管理規定」。雖然話係徵求意見，不過就講到明節目唔可以宣揚童星效應、炒作明星子女，禁止10歲以下兒童代言廣告等，其中又有一條「避免未成年人親眼目睹家庭矛盾衝突和情感糾紛」，即係話，節目內見到爸爸媽媽鬧交都唔得。

據大陸《人民網》報道，呢次徵求意見去到9月23日，如果《爸爸6》同《想想辦法吧！爸爸》要完全遵守呢啲守則，即係至少要等多一個月先有機會播出。

精選娛聞，喺晒《娛果》
http://fb.com/appledailyent