個個都想創業，唔通個個都可以創到業咩？運輸及房屋局局長政治助理符傳富（Mark）就做到喎，港大精算系畢業嘅阿Mark，大學二年級已經同中學同學夾份搞補習社，喺旺角太子一帶租地方，小班教授數學，笑指「回本都算回得快」！

現屆政治助理唔少高材生，阿Mark係其中一個，讀男拔嘅佢係2005年會考嘅8A狀元，當年考10科只有英文同宗教唔係A。阿Mark唔係贏在起跑線，爸爸喺車房做，媽媽係主婦，一家五口住居屋，自稱係將軍澳「原居民」，因嗰時未有地鐵，小學出旺角返學要搭成個鐘頭車。

會考8A　從未通宵溫書

雖則會考8A，但阿Mark話小學讀書唔算標青，派位入男拔後亦唔係好勤力，「真係未試過通宵咪書」，覺得讀書最重要係消化內容、融會貫通，唔好死記爛記。中四同中五嘅搏殺時候，佢都繼續幫手搞學生會，中六直頭組閣參選，做埋主席。
由於成績好，拔尖到港大讀精算，升大學後同中學就相識嘅女友、即係現時嘅太太拍拖。2009年畢業後入咗畢馬威會計師事務所打工，至2012年喺新界東立法會選舉為自由黨田北俊助選，之後入埋自由黨，2016年出任自由黨青年團主席，今年更走入政府熱廚房。至於因為「傳」字同「傅」字字形相似，個名經常被誤讀為「符傅富」，佢話細細個已經喺咁，習以為常！