四洲集團(374)創辦人兼主席戴德豐一向作風低調,噚日集團旗下首間無人零食物語期間限定店喺旺角開張,吸引咗唔少傳媒採訪,場面好墟冚!戴生一聽到記者問有關零食嘅問題就好有興趣,佢話自己70歲仲日日食零食,最鍾意就係食紫菜!
問答環節嘅時間,主持叫記者先舉手再問問題,點知戴生就先舉手,同在場朋友推介四洲粒粒橙果汁,話記者後生可能未飲過,一定要試吓!四洲最出名就係紫菜,戴生話公司最近出嘅新產品夾心紫菜係佢嘅idea,推出夾心紫菜證明咗零食係千變萬化,好好玩同埋係一種好好嘅享受。
雖然已經70歲,但戴生話自己仲日日食緊零食,食零食係好開心嘅一件事,開心就會健康。佢特別鍾意食紫菜,因為紫菜本身有益,如果夾埋啲芝麻、南瓜、堅果就更加有益。