仲有一個月唔夠就到農曆新年，又係各大企業派利是封畀街坊嘅時候！令人年年期待嘅，就係星展香港（DBS）出晒名嘅招牌利是封，一對金童玉女阿星（女）、阿展（男），今年手上捧住一個大元寶，著住靚靚中國傳統服飾同大家拜年。

華華知道，原來新加坡總公司每年都會搵唔同設計公司聯手創作，就係為咗帶啲新鮮感畀大家。舊陣時，唔係DBS客就無機會攞到呢啲利是封，上網睇一睇就可以見到幾咁「有價有市」；今年DBS特登整咗個Facebook chatbot遊戲畀公眾換利是封，推出頭兩日已經換領超過1,000套利是封，就知道一如以往，都係咁受歡迎啦！

呢對代表「Children of Asia（亞洲小孩）」嘅金童玉女，由2007年第1年喺利是封出現仲係BB，家陣已經係小童，如果期待佢哋變中童嘅話，就可能失望啦，皆因聽講佢哋已經大定啦喎。