轉戰大陸嘅李彩華(Rain)，之前就到大台為薛家燕同黎小田主持嘅節目《流行經典50年》做嘉賓，演繹佢嘅金曲《你唔愛我啦》，咁經唔經典就見仁見智嘅，但李彩華今日就喺尖沙嘴舉行記者會，宣佈將於下月27日，喺旺角麥花臣場館舉行一場名為《十月的雨》演唱會。

Rain今日着住黑色皮褲，黑色bra top魚網衫，嗱！又係魚網衫呀！Rain話自己咁多年都天生麗質，係冇做運動，但係因為演唱會，佢就開始要做過運動：「從來唔鍾意做運動，為演唱會加緊練習吓，以前經過唔想入去gym，第一次走上跑步機，驚自己快步，隻腳會粗，所以急步行，不過，估唔到幾首歌就過咗15分鐘，感覺都唔錯。」問佢男友何遠恒有冇陪做運動？佢話：「男友鍾意做運動，以前佢叫我都唔會做，o依家可以一齊做運動，感覺唔錯。」

做運動咁辛苦，係咪想演唱會大騷性感？佢話：「應該都會，會勁過演唱會海報。咁短過少少都叫勁過，到時仲會搵好多friend。」咁男友會唔會上台一齊表演先，Rain話：「就要靠你哋，睇你哋聲勢，會叫好多朋友上來玩，o依家rundown搞緊，衫就唔需要佢過目，相信佢好相信我啲團隊。」

如果o依家仲揀緊歌，又會唔會揀以前男友林峯嘅歌，Rain話：「可以考慮，佢都有好多快歌，其實對自己首個演唱會，都會好緊張，日子到，差唔多到會好緊張，我會唱啲大家耳熟能詳嘅歌，大家都會聽得好開心。」

講到之前上佢tvb節目唱歌，有網民話佢個樣唔同咗，咁有冇唔開心先？佢話冇：「我唔會上心，起碼佢哋睇哂我幾分鐘表現，我睇番啲大陸劇，紥哂孖辮，梳齊蔭唔似我，最緊要自己relax，我自己好正面，所以自殺，抑鬱，同我完全冇關係，我唔會諗呢啲野。」