四川廣元市青川縣馬公鄉今午2時14分發生黎克特制5.4級地震，震源深度13千米，有指四川多地出現強烈震感，包括成都、廣元、德陽、綿竹、南充、瀘州、遂寧同內江等地方。而成都鐵路局指已緊急停了寶成鐵路成都至廣元段、綿成樂鐵路成都東至江油段行駛嘅所有列車，鐵路部門仲會安排人員對設備進行檢查。( 新聞連結： http://bit.ly/2fETRv5 )

而Twins今晚7時半將喺成都巿四川省省體育館舉行《TwinsLOL世界巡迴演唱》，但佢哋嘅演唱就未受地震影響，將如期舉行。下午蔡卓妍(阿Sa)、鍾欣潼(阿嬌)同台前幕後工作人員如常綵排，佢哋仲綵排得好落力，阿Sa同阿嬌仲素顏出鏡，網上仲有佢哋綵排相，Twins同團隊喺開騷前齊齊拜神祈福，希望演出順利，大家又切燒豬。胡定欣舊愛、音樂人Terry Chan都有參與呢次演出，佢今午仲喺社交網站貼相報平安。

而Twins嘅經理人霍汶希（Mani）今日回覆《蘋果》時亦代報平安話：「佢哋第一次感受到咁強烈地震，但佢哋好安全，阿Sa同阿嬌都好平安，大家放心。」