仲記唔記得多蒙特果位12歲嘅足球神童莫高高（Youssoufa Moukoko）？呢位今年8月先至「升呢」越級挑戰踢U17比賽嘅超新星，上周末連中三元，幫多蒙特贏比勒費爾德3:1。計計埋埋，莫高高今季原來已經射入咗16球咁多，認真誇張！

話說今個月較早時候有一場多蒙特贏3:2嘅比賽，莫高高當時無入波，係佢今年8月以嚟踢U17比賽嘅第一次。不過，呢位喺喀麥隆出世嘅後生仔只係經歷咗一場波嘅「入球荒」，喺上周末對比勒費爾德場波就即刻入三粒，今季累積射入16球。莫高高「升呢」踢U17比賽嘅時候，多蒙特U15教練已經預言呢位只係得12歲嘅神童今季最少會射入12球，家陣已經就嚟達標喇！