尾場三班1650米，梁家俊騎摩廐「君悅灣」恃住貼欄一步不蝕，成功由頭帶到尾，四歲馬爆7.6倍win打開谷草勝門，而騎者連同第二場贏告廐「名馬」，自製一口冷孖寶，兼係全晚唯一有馬贏華將。
大摩不在港，今晚冇親自督戰而照贏「君悅灣」，尾場柏寶騎新勝四班一哩之賢廐馬「馬飛龍」受制於外檔，抄大外叠轉入直路，拉士呈強弩之末，追極都追唔到「君悅灣」做二奶，5.5倍啡燈win輸到落飛黨眼癱癱，幸而「君悅灣」搭「馬飛龍」26倍啡燈Q補番條數，全場埋單仍有錢贏。三、四名分別係「綻放美麗」同「津津樂道」，四重彩派1.5萬。
「君悅灣」贏馬後，赫然見到無綫靚女阿雪孫慧雪手拖男伴拉頭馬，阿雪右腳受傷，她在微博說今天在穿著高踭鞋趕往做訪問途中仆在街上，皮破血流，幸有五六位餐廳裏的人及途人攙扶，替她清洗傷口及包紮，估不到下午行衰運，晚上入場打氣，卻帶旺馬主趙文憲贏馬。