張紋嘉，一個人住第9年。

從前的她，最愛呼朋喚友把屋企弄成最熱鬧的地方，現在的她，只想三五知己淺酌談心，更自嘲屬於「極毒」程度，可以一個人做任何事。即使現在是「戀愛ing」，都寧願擁有自己的空間，笑言與男友各自獨居是浪費資源，但她還是享受一個人的獨立單位。

張紋嘉（Crystal）日前於觀塘為新歌《獨立單位》宣傳，她說：「呢首歌係一個獨居嘅故事，而90%都係我嘅故事。歌詞入面講到，一個人喺茶几食飯、啲衫可以周圍放，其實嗰個真係我。」Crystal憶起9年前，搬家的原因是一時衝動：「嗰陣因為工作時間長，唔方便同屋企人住，有試過同居，最後係分手收場。嗰刻好唔開心，於是就『我要改變生活！我要自強！』完全冇諗過水電煤、日常開支嗰啲問題，其實係好大鑊。」

「以前我好鍾意叫好多朋友上嚟屋企，後生吖嘛，有個竇就會叫人嚟玩。自從有次搬入西貢，住咁遠真係冇乜朋友會嚟探你，嗰陣事業又唔係咁順利又冇拍拖，好孤獨。我就去西貢市中心搵間cafe坐，嗰陣Regen（張惠雅）啱啱離開咗HotCha，工作少咗，感覺好唔同，但係我反而用嗰段時間重整新生活。而家，我都歡迎朋友嚟，但最多三五個，飲少少酒傾吓偈。我係『極毒』嗰隻，網上咪有個表可以睇下自己有幾『毒』嘅，一個人睇戲、一個人去旅行嗰啲，我全部做晒，我需要朋友，但係朋友唔係用嚟解悶，係真心互相支持對方嗰種。」到底一個人是否就等於「毒」？

Crystal的獨居體驗，是磨練亦是成長：「自信提升咗，做組合始終會有比較，當時我覺得自己係好格格不入，Regen跳舞叻啲、Winkie（黎美言）同人溝通又好啲，我覺得好冇存在感。以前人哋讚我，我都會否定自己，而家有人讚我，我會講多謝。之前去美國讀咗3個月書，老師同同學會日日都搵啲嘢讚你，可能讚吓你件衫、你個妝、你對鞋，就算上堂，老師都會讚咗先再提議點去做好啲。有啲人會覺得咁係偽善，但如果可以令人更有自信，做得更好，幾好吖。我鍾意而家嘅自己多啲，以前多啲青春、多啲collagen啫。」

談到她的獨居單位，何時會有男主人？Crystal坦承現在是戀愛中：「感情生活OK，大家步伐幾好，我哋都係獨居。而家知道同居唔係咁簡單，唔係執嘢一齊住，好多生活習慣唔同，而且唔算拍咗好耐，好多朋友都覺得我哋浪費資源。不過我都係想我有我、你有你多啲，嗰個係畀自己一個保障、一個心靈空間，因為你唔知道之後會發生咩事。我有同男朋友講過，如果我一世都想一個人，呢個諗法係咪好自私？佢話佢冇所謂，每個人都有自己生活方式。其實我覺得好自私，但呢個階段我完全冇諗結婚，生仔更加唔會，或者等我搵到個好愛好愛好愛嘅人先。」

採訪：盧妹
場地：Return Coffee

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb

《Captain Marvel》完全導讀本
足料78頁 深度解構最強英雄！
https://bit.ly/2VyXIt2

第二屆最港電影大獎投票網址
https://bit.ly/thekongestfilmawards2018