當年今日
關於我們

【《今日ENT》2】一日食六餐練性感舞 蔡一智叫男觀眾:帶多啲紙巾嚟

蘋果日報 2017/10/30 22:46

紅館演唱會蔡一智蔡一傑蘇志威

草蜢今日去到《蘋果》娛樂全新嘅facebook專頁《娛果》出席直播節目《今日ENT》,嚟緊11月5號佢哋就會開演唱會。問到觀眾嚟睇今次演唱會有冇啲乜要特別準備?蔡一傑即刻話:「最緊要對波鞋,千祈唔好著對高踭鞋嚟,拗柴就唔係幾好啦。」
講到演唱會嘅事前準備,阿智就話:「最緊要食飽啲嚟,冇氣力我驚你哋頂唔到由頭跳到落尾。」阿傑就話:「咁我哋都要食飽啲,以前成日話keep fit,我發現今次唔使,跳完一轉之後就瘦晒。」阿智話:「係呀,食完lunch排個舞,兩個鐘後又要食下午茶,如果唔係會腳軟,冇力呀,o依家一日要食五六餐,兩個鐘食一次,好似BB仔飲奶咁。」阿傑:「今次個演唱會編排好密集,有機會就食嘢,如果唔係唔夠力跳,今次我哋嘅音樂連我哋自己都覺得好唔同,今次有個主題。」阿智表示:「都就到演唱會,爆俾大家聽,今次我哋嘅演唱會入面會有個演唱會,即係買個豆沙包,入面仲有個豆沙。」
其實草蜢識咗咁多年,有冇試過鬧交之類?聽到呢條問題,阿傑即刻話:「又係問呢啲問題嘅?俾啲新意啦。」阿智幽默回應:「我哋最近轉咗玩法,每日講五十次I Love You。」仲即席同蘇老闆隔空傳情咀嘴,講到大家對大家嘅一樣不滿之處,阿傑指住蘇老闆話:「不滿佢太靚仔。」蘇老闆指住自己笑言:「有圖有新相。」阿智就話:「見演唱會日日排舞,啲Dancer都好辛苦,我成日講大家萬歲,佢兩個就冇喇。」蘇老闆即刻反擊:「是但捉個出嚟問,最近三次嘅嘢食邊個請。」阿智反駁:「買一抽提子俾成大班人食,都算買咗嘅。」蘇老闆好無奈咁表示:「點解成日喺鏡頭面前屈我㗎呢。」講完不滿,其實又有冇乜嘢地方對方係值得欣賞嘅呢?阿智話:「講真心你又話我假,我最欣賞嗰兩個喺晒我隔離。」
最後記者邀請草蜢三位即席排一場舞,阿智就話:「唉呀唔跳得《忘情森巴舞》,我哋今次將佢重申編過,新嘢嚟,唔爆得㗎喎,連首歌同大家平時聽嘅都唔一樣。」最後阿傑提議大家一齊跳《夜性感》,仲考返自己嘅Dancers嘅臨場反應,跳返個Halloween版本,問到到時演唱會呢首歌三位草蜢會唔會唔著衫跳,阿傑就話:「呢首歌喺我哋過往嘅演唱會都冇正式唱過,今次拎咗出嚟放大佢,話明叫做《夜性感》,希望到時大家睇到血脈沸騰。」阿智就即刻幽默補充:「男士們燥嘅話唔好嚟,唔好食羊腩煲,你知啦,食咗好麻煩㗎,一係你帶多啲紙巾嚟。」
更多娛聞,喺晒《娛果》
http://fb.com/appledailyent