「都教授」金秀賢今日又出動喇！佢今日飛去泰國準備舉行粉絲見面會，雖然冇再梳齊蔭頭，但依然好受歡迎，喺韓國機場出發嗰陣，仲好nice咁揮手同大家saybye。

去到泰國機場時，場面好誇張，接機粉絲企滿三層樓，好在啲粉絲都好乖，企喺兩邊空出中間條路等金秀賢行出嚟。金秀賢喺經理人、保安等等護駕下步出禁區，粉絲即刻包圍金秀賢，金秀賢都有被嚇一嚇，佢就快俾粉絲圍到見佢唔到，唔知以為睇緊《威利在哪裡？》嗰本書。不過佢好快定神，仲超級親民同周圍粉絲揮手，連企樓上嘅粉絲都招呼埋，真係好識做！