【李八方online】拓展黃色經濟圈 譚凱邦發動「廁紙革命」
蘋果日報 2019/12/10 15:36
譚凱邦李八方ONLINE廁紙革命
譚凱邦FB圖片／照片
反送中運動6月爆發後，唔少香港人出街開飯前，都會先睇下間餐廳係藍店定黃店。環保觸覺創辦人、早前喺荃灣馬灣選區高票連任嘅新民主同盟譚凱邦（Roy），最近就更進一步擴展黃色經濟圈，令香港人用廁紙時都可以揀「黃絲」廁紙嚟用。
話說阿Roy最近發現咗一間位於元朗、香港本土嘅「黃絲」回收公司，呢間公司喺香港收集廢紙後，即運往越南造成廁紙，可以賣返畀香港人用。阿Roy同八方講，留意到唔少馬灣街坊過去買廁紙時只能幫襯島內超巿，又或者山長水遠喺島外運返屋企，現時市面上8成廁紙更係大陸品牌。為咗令馬灣街坊可以喺生活上進一步脫離大陸，同時推動環保兼令黃絲老闆受惠，決定為馬灣街坊團購1,000條呢種「黃絲」廁紙。
阿Roy今日就喺FB出post，呼籲有興趣嘅馬灣街坊，填寫網上表格訂購： http://bit.ly/2t3loN5，又或者到佢議辦登記交錢，下個月6號就可以去佢議辦攞貨。佢話若果馬灣街坊反應理想，就會進一步喺荃灣推動呢個「廁紙革命」，令荃灣街坊一齊受惠。
一向關注環保問題嘅阿Roy又話，香港長遠應該有一間香港本土再造紙廠，因為香港人每日製造出嚟嘅大量廢紙，其實都搵緊出路，佢認為香港有700萬人，絕對消化到呢啲廢紙製成嘅再造紙，希望環保業界同政府都認真諗諗。
Roy最近發現咗一間位於元朗、香港本土嘅「黃絲」回收公司。譚凱邦FB照片