今次夜賽（6日），快活谷編跑八場，場地可能會受天雨影響。今戰採用全闊A跑道角逐，利內檔前領或能跟守好位馬匹，爭勝機會可秤先。莫雷拉停賽，潘頓騎足八場，必把握機會盡數糊，方嘉柏全力支持，提供五匹坐騎，其餘三駒都近績好狀態勇，有權連場報捷。

第五場四班1650米：「型酒杯」慢熱自購馬，減夠分狀態也跑起了，前仗在1800米用潘頓出擊，但遇上「千金一諾」，拼敗無話可說，論發揮已一絕，只因對手太強。上仗轉戰一哩，改配貝湯美，路程稍嫌短，但都交出全場最快拉士，追入殿軍。

由於賽程所限，四班合適路程只有一哩，恨贏馬繼續上陣，但今仗回配潘頓，應有更佳發揮，復課重養為主，上周末（2日）跳番課，身靚步闊有力，狀態仍出色，大步後追馬，抽排大外檔，更有助發揮。

「順其自然」有備而來，試大閘末段衝刺時受阻，其實好有追勢，埋門加強拍跳走勢硬朗，排位朝沈拿單試，過終點有拉唔住之勢，睇狀態靚番晒，出戰贏馬路程，負輕磅排好檔位，是今場最佳冷馬。

「川河領駒」路程首本，曾擊敗「歐洲之星」及「獻惑」，黃俊上次騎過也上名，不難發揮，排五檔有助做好走位留放，是三甲之選。

「萬事醒」曾退出，但復課無唔妥，埋門拍跳仍墜手，有爭勝水準。「勁嘉輝」新勝馬，復課身靚快跳硬朗，但近兩季甚少打疊跑得好。