當年今日
關於我們

【短片】【情場屢次失意】攻內地娛圈 陸詩韻「釣金龜」汲取教訓

蘋果日報 2015/05/28 06:00

蘋果內地陸詩韻囡囡即時娛圈媽咪情場屢次失意愛情符

前港姐亞軍、34歲嘅藝人陸詩韻(Sharon),自出道以來,一直被標籤「專釣金龜」,先後同富商曾文能、「廉署剋星」律師林炳昌、「油王」朱明等人傳過緋聞。

早年被爆同馬來西亞華僑吳銘偉(Jeff)撻著,雙雙遠赴汶萊,令戀情曝光,陸詩韻更宣佈同Jeff訂咗婚,兩人更合作做生意,後嚟發現男方係「空心老倌」,更有傳對方喺新加坡早已有家室兼育有一女,最終陸詩韻疑與對方分手收場兼對簿公堂。

今日有周刊指,喺情海翻波多年嘅陸詩韻,屢次遇人不淑,唔係被人撬牆腳,就係揀錯咗情郎,傷得最盡嘅係上年佢以董事身份,為前未婚夫Jeff嘅公司做貸款擔保人,點知被銀行追數71萬元,幫對方還債之餘,人財兩失,人生最痛莫過於此,更由昔日同Jeff住匡湖居,現時已搬回將軍澳居屋住,多得家人嘅安慰及支持,早前陸詩韻胞弟結婚,佢哋一家決定搬入元朗,轉換新環境再嚟過,陸詩韻近日拍有線節目《帶阿媽去旅行》透露決心再戰娛圈,專攻內地市場。

陸詩韻喺節目中,被問及上年為前未婚夫Jeff還債一事,陸詩韻坦言今次跌得好傷,汲取咗教訓,當時自己認定咗對方,就咩都冇諗,後嚟被債務纏身,佢就覺得唔好再有第二次就得,跌倒都要爬番起身,陸詩韻早前為爸爸打理製衣生意,不過佢認為嗰行唔係佢嘅興趣,佢都想重返娛圈,上年年尾簽咗畀謝天華太太Tina,由Tina做經理人,ready去內地拍劇,0依家好多job都係通知經理人,佢暫時未知有咩job喺手,只知有套劇係搵佢演觀音一角,有時就會練好普通話,好在古裝講對白可以慢啲!

陸詩韻喺訪問表示,對婚姻仍然有憧憬,笑言自己唔心急拍拖,一切隨緣,喺《帶阿媽去旅行》節目中,陸詩韻媽咪就為囡囡求咗個愛情順利符,想囡囡可以早日出嫁!