當那邊廂郭氏三兄弟繼續上演玄武門之變，另一大家族又嚟玩串燒三兄弟，以為祝福人家新婚三年抱兩就好勁，自從見識過有兩年抱三仲要係「慈菇椗」後，唔少人都改晒口，家睇嚟又要改為恭祝對方一炮三響。
路過中環街頭巷尾午飯前後左右食客皆議論紛紛，鬧嘅人反而唔多，不過大家都普遍認為李公子應該快速替3個小朋友搵番個媽媽，買蛋容易過買親情，聽講曾經有常春藤大學女生靠賣蛋閒閒哋都可以搵到萬幾蚊美金一年，即係差不多成年嘅學費，不過過程就好殘酷加辛苦。
徐子淇雖然係生女，但係女唔好咩？家周圍都係女人天下，起碼仲要係天然自家精製，小朋友生長在充滿親情嘅完整家庭，幸福好多。

打工仔想做四叔員工

在人人講錢嘅社會風氣下，原來個個都想當恒基地產（012）旗下嘅員工，老闆封利是閒閒哋成皮嘢，遇啱呢排股票唔聽話，唔少股民嘅積蓄又鎖死咗在新股未回籠，聽講有連另一家上市公司TVB嘅職員都好想四叔快啲收購佢哋，咁就時時有利是喇！
個市升埋升埋早已山雨欲來，今明兩日有四環醫藥（460）加埋隻AIA（1299），後者在未正式掛牌前，市場已不斷放風話暗盤升1成，又話肯定會入甚麼大鱷指數成份股，又講到有幾多張頂頭槌大飛，搞到個場好旺求過於供，首日掛牌仲要玩埋十人應戰十輪齊發，當然淨係輪商追貨都追到氣咳啦，呢個睇嚟又係一個自我完成機制，與股價穩定機制配合得天衣無縫。
怕就怕散戶唔肯接貨，AIA照正掛牌首半年應該相安無事，因為阿媽AIG被反手綑綁，只係班大帝使唔使吹得咁大，真係咁勁就唔該講暗盤升夠3成，好彩中東幫於上市前成功壓價，AIA才保得住呢1成。
其實有好友仍然對佢有非份之想，話講唔埋花旗國中期選舉前，聯儲局會指使高佬出嚟身先士卒掃貨，展示一下美資嘅戰鬥力。

胡孟青
作者為獨立股評人