資深大律師胡漢清同佢媽媽、86歲嘅莊永楚，去年發生金錢糾紛，而胡漢清嘅新任太太江希文又加入戰團，被傳將胡母拒於胡宅門外，事件一發不可收拾，雖然最後事件叫做解決，莊永楚拿回上海大屋及500萬現金，但已令母子、婆媳關係陷入僵局，莊永楚更話過同江希文「餘生唔想再見」...

今日又有報道話，莊永楚事後一直未有同胡漢清聯絡，而早前，莊永楚要入院做腳部手術，佢嘅姪女亦話，老人家已經立好晒遺囑，大部分嘅錢會留俾胡漢清同前妻所生嘅一對孫仔孫女，話因為一直同佢哋感情好好，又會留一筆錢捐俾做手術嘅醫院，多謝佢哋咁多年嘅照顧。咁江希文同佢一歲嘅女呢？就一分錢都冇啦。

胡母行到呢一步，據報道講係因為胡漢清突然發律師信俾白韻琹，質疑白姐姐去年幫莊永楚開記招一事上有冇獲得利益喎，白姐姐就話唔驚，認為胡生冇權咁做，又話只係覺得胡媽媽好可憐。