韓劇《茶煲阿四》嘅36歲女星韓藝瑟，前晚於Instagram自爆因為進行脂肪瘤手術時遇上醫療事故，目前傷口未癒合之餘更留有疤痕，但院方卻冇提過任何賠償事宜。而負責手術嘅江南CHA醫院噚日表示，喺用電燒切除脂肪瘤嘅手術過程中，有部位皮膚被灼傷，將會為韓藝瑟進行整形手術以恢復舊貌，之後再商討賠償事宜。

而當日執刀嘅外科醫生李教授噚日透過醫學頻道Be on D嘅訪問，承認手術失誤並向韓藝瑟公開道歉。李教授稱韓藝瑟係於本月2號接受手術，兩人首次見面係施手術嘅一星期前，當時已經向韓藝瑟表示術後會有疤痕，所以了建議佢咨詢術後嘅整形手術，而施術當日係兩人第二次見面。

李教授亦具體指到手術過程：「韓藝瑟手臂上嘅脂肪瘤約5至8厘米大，大概位置比韓藝瑟公開嘅相中傷痕嘅位置更闊。如果直接喺上面做切除手術會簡單啲，但考慮到病人演員嘅身份，為咗能夠着衫都遮到傷口，所以決定喺下方進行切除。」李教授表示當時係由助手拉住皮膚，由佢負責切除，但喺電燒剝離嘅過程中，發生咗從皮膚裡穿透到外面嘅事故，正係呢個原因導致皮膚上出現窟窿。李教授表示手術當日已經向其監護人承認過失行為，坦言係自己「判斷有誤」並稱「真心向韓藝瑟再次表示歉意」。

相關新聞連結：
《茶煲阿四》韓藝瑟手術遇醫療事故：任何賠償都安慰唔到
https://bit.ly/2qQ98KX

更多韓流，喺曬《娛果》
http://fb.com/appledailyent