噚日明明係立法會港島區補選，不過八方差啲以為時光倒流，重返今年初特首選舉，因為文革曾竟然着番佢嗰件印有「我會做好呢份工」口號嘅競選制服去投票，仲要同老婆齊齊着，當正係情侶裝咁樣，呢個dresscode，究竟有乜含意，令人十分𢱑頭。
鑑於文革曾患有「偶發性語言失調症」，早前有將習近平嗌錯做「習主席」嘅劣績，八方大膽假設，佢今次可能係擔心開口夾着脷，所以用另類方法表態。
八方斷估，佢可能想畀暗號港島左派人士，呼籲大家做好本份，投票畀中央支持候選人，幫手助選嘅更加要「做好呢份工」，一旦葉劉落選，好多人要揹鑊，連累佢連份工都冇埋。