今年33歲嘅奧斯卡影后琦溫絲莉（KateWinslet），早排同英國維珍集團大老闆（RichardBranson）外甥、比佢細2歲嘅NedRocknroll撻着。近日琦姐第一次去上海，幫浪琴錶做代言人出席宣傳活動，熱戀中嘅佢仲帶埋新歡同行，兩個人更忍唔住十指緊扣拖手，Ned又偷摸琦姐patpat。

拖手傳情旁若無人

前晚琦溫絲莉喺浪琴錶晚宴現身，同場有內地女星劉亦菲、秦海璐、李晨等，劉亦菲着咗條鮮黃色開高衩嘅晚裝，上台時差啲走光，但講到風頭點都唔夠帶埋新男友亮相嘅琦姐。有男友Ned相伴嘅琦姐心情靚爆，喺入場嘅backdrop同記者面前，佢哋都好守規矩分開企，但入場後就十分癡纏，琦姐同男友好大方咁坐埋一齊食飯，咬耳仔傾密偈唔在講，仲眉目傳情甜到漏。
雖然有大批賓客喺度，佢哋一於懶理，Ned仲拖住琦姐嘅手十指緊扣咁行，旁若無人非常sweet，有嘉賓到Ned趁冇人睇到，仲靜靜摸咗琦姐patpat幾吓，琦姐對男友佻皮舉動，即時報上個會心微笑，似乎相當受落。
琦姐同男友Ned分別喺舊年同今年初離咗婚，兩人8月喺加勒比海私人小島相識就火速撻着，熱戀只係一個多月，難怪寸步不離。