時窮節乃現。黎智英是否一個完美嘅人？當然唔係；但佢係咪十惡不赦，殺人放火，出入法庭要上鎖鏈，要被送去最高設防監獄？亦都絕對唔係。佢願意留低做烈士，接受住比一般示威者更苛刻嘅對待，甚至隨時無命出返嚟。真正嘅勇氣，大概如此。

法官都係一樣。佢哋唔會大大聲講佢哋心底嘅立場，但其實一般小市民都好容易睇得出。邊個法官講證據、邊個法官「我對眼就係證據」；邊個法官有腰骨，邊個法官係道德侏儒。無謂指名道姓，心照即可。

而家我哋嘅時代就係咁樣。是人是鬼，一目了然，唔容許曖昧空間，無灰色地帶。《國安法》底下，你一定要選擇你想做邊種人，而全世界都會睇住你揀。近日我發現，原來美國駐港領事館新增咗一個網頁，列出咗《國安法》生效以來87個被捕同埋4個被起訴嘅人。睇嚟政府同市民對「一少撮人」嘅理解好唔同。

上星期其中一位被捕嘅係律師關尚義。佢係美國人，但已經嚟咗香港幾十年。佢喺保釋之後做咗個訪問，內容其實都係老生常談，佢認為香港總會有普通人同律師企出嚟為人權同民主發聲。當人民唔放棄，歷史就會被改變。

關先生喺做律師前有另一個身份，就係天主教神父；而佢喺訪問入面，亦都真係好似神父咁講道理。佢做咗個比喻：「社會就好似身體，如果我哋手指俾人打，成個身體都會唔舒服。你見到人哋無論喺邊度被剝削，希望最低限度有少少唔舒服，最好係你肯出聲啊。」

知易行難。見住好多朋友決定離開香港，我唔敢講我都有黎智英或關尚義嘅勇氣，從此留喺香港同中共喺籠入面鬥爭；不過無論身處何地，我哋都要記住自己嘅香港人身份，記住手足，做我哋做到嘅嘢，發聲。

「愛裏沒有懼怕。」希望我哋都有真正嘅愛，戰勝少少嘅恐懼。

以上內容為作者個人意見。

林日君 @ 法政巴絲

法政「巴絲」— 法律界的「巴打」和「絲打」。不知絲襪奶茶，配以豆腐火腩飯，會是怎樣的味道？當浪漫的男人，遇上活潑的女孩，又會擦出甚麼樣的火花？讓法律界的朋友一起來，同大家赤裸裸 gossip 呢行嘅八卦趣事。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！