馬會牌委會早在6月6日宣佈下季騎師牌照安排，莫雷拉得悉獲發全季公司騎師之後，立即重拾以往的神力，變回昔日的「雷神」，已連續三次賽事壓倒潘頓成為騎師王，贏盡面子。

莫雷拉今季騎少潘頓三個月，兼且做咗蔡約翰主帥，唔可以自由地揀馬騎，令頭馬數目不如前，以剛戰（16日）為例，賽前已替賢廐「翠湖飛鷹」兩試大閘，因為要騎同場蔡廐馬「友瑩囍」而被迫放手，最後益咗梁家俊贏馬。

不過下季雷神可以做番全季公司騎師，回復自由身之後，有力挑戰潘頓一哥地位。

近三次賽事莫雷拉都成為騎師王，重現霸氣，周日（23日）共策九駒上陣，當中不乏實力座騎，有望取得騎師王四連霸。

其中，第二場四班2000米「多多」，上仗跑1800米追唔切得第三，加程更合可打開勝門；第五場四班1200米「首飾大聖」，兩戰同程形勢不利也追得好，質素甚高，有權一網打盡。

大賽方面，第八場三級賽1800米精英碟「翠龍」，上仗配李寶利跑三級賽1600米獅子山錦標得第三，當時由莫雷拉揀騎的廐侶「勝得精彩」捧盃。

今次他不騎「達羅素」選擇替「翠龍」壓陣，後駒預料是馬房主力，且看雷神可否以主帥身份捧盃。

莫雷拉騎師王三連霸
日期　　出馬　　成績　　　積分
16/06　十一匹　3冠1亞　　 42
12/06　八匹　　2冠1亞1季　34
08/06　十匹　　2冠1亞3季　42

-----------------------------
你撐蘋果 我捐$1
支援反送中抗爭者