樓市兩極化越嚟越嚴重，正牌豪宅身價大漲，有證券行話，家吓買發展商吹噓嘅豪宅（價錢介乎300至1500萬元），倒不如買名車同埋名牌手袋好過，若然係限量版，就更加有保值同升值潛力喇。
瑞信董事總經理林鴻楷噚日開記者會，講股市之餘，亦提吓樓市，佢預期今年住宅樓市，尤其係二手市場將會反彈，樓價有可能升5至10%。但佢提醒大家，一手同二手樓嘅差價正不斷擴闊，換舊屋買新屋，皮費勁重。佢建議諗住置業嘅用家，應該揀300萬銀以下嘅屋仔，炒家或投資者更應非3000萬以上物業不揀，因為呢類物業先至算得上係真正豪宅。

咁介乎300萬至3000萬元嘅物業呢？林鴻楷就唔建議買，因為既然拎得錢出嚟買，倒不如買架靚車，好似保時捷、法拉利咁，呢啲仲保值喎，分分鐘落定買架新版靚車嗰個「quota」，都可以炒番轉。除咗買車，佢話仲可以考慮買LV手袋，但緊記買「限量版」先會有保值效果。
瑞信亦趁新春兼近日細價股熱炒，醒各投資者幾隻利是股。舊年該行選嘅利是股，累積回報達50%，不過，其中揀嘅廸生創建（113）舊年跌咗逾25%。今年佢哋就揀選五隻細價股，估計回報有47%，包括香港上市嘅豐德麗（571）、台灣華固建設，馬來西亞EvergreenFibreboard、新加坡GemsTVHoldings及泰國SiamFutureDevelopment五隻亞太區利是股。其中豐德麗一年目標價10.2元，較現價7元，有45.7%上升潛力。又睇吓佢哋今年中唔中。
[email protected]