是日港股跟外圍低開，恒指跌完110點後，跟日本仔低位反彈，埋單反升16點。昨日所講，有低位，要買C輪。推介嘅滙控C輪4956，夠膽低位撈貨，去到收市已經坐緊13%利潤；長實C輪3622，低位撈貨，到收市又係有12%進賬；建行C輪4556差啲，低位撈貨只升得3%。
第2階段縮窄買賣差價實施，炒友未習慣，買賣窒住窒住，交投減少22億元。遲早習慣，唔使擔心個市會一潭死水。
東亞C輪3576：東亞（023）跌1.05元，收30.55元。最低30.25元，3字大關守得住，趁低執啲C輪博反彈，吼3576。隻輪明年4月尾夠鐘，輪價43.5仙，溢價5.9%，槓桿率7倍（有效4.6倍），引伸波幅32.8%。
聯通C輪9846：聯通（762）跌6仙，收6.84元。等聯通跌多幾個位，買C輪9846博反彈。隻輪12月初到期，輪價1.03元，溢價3.5%，槓桿率6.6倍（有效5.3倍），引伸波幅31.7%。

日經C輪9934：日經指數C輪9934，同類輪中交投最熱，金額逾9百萬，收11.7仙，跌3%，但較最低價9.4仙（當時日經散261點，埋單只係唔見26點），則大反彈24%。下次如果見日經大散，撈些少，博反彈。講數據，唔算靚，所以入市做嘢，有錢賺冇錢賺都要做快閃黨。
章盛