近年港姐面試質素參差，看着各有特色的參賽佳麗，無綫舉辦《香港小姐競選》上年踏入第47屆，今年受武漢肺炎影響，無綫決定停辦港姐一年，去年三甲黃嘉雯、王菲及古佩玲未能卸任，變相要做足兩年港姐，而早前宣佈延期的《2020國際中華小姐競選》亦同樣暫停1年，一眾前輩亦關心此事。

1998年「四料港姐」向海嵐獲悉港姐今屆受疫情影響要停辦，她今日接受《蘋果》訪問時說：「今朝睇到呢個新聞時有少少surprise，我覺好可惜，我希望今次只係疫情嘅關係，為大家嘅健康同安全停辦，希望港姐可以繼續做落去，都做咗40幾年，我也係其中一屆港姐，希望港姐可以一直傳承落去，佢屬於香港人一件盛事，始終香港小姐好代表到香港，疫情後希望搞番，唔好以後都停。」

2001年港姐冠軍楊思琦，則認為港姐是傳統承接落去的選美活動，對於今年要停辦有些可惜，不過健康很緊要，她續道：「因為咁大型嘅選美，嚟緊要面對好多傳媒同去好多地方，會增加感染風險，考慮到呢點，兩者取捨之下，都係健康重要啲，如果因為咁而感染到就好無辜同好慘。希望下年港姐可以再辦過，亦都希望疫情可以快啲過去，因為呢件事唔單單只係香港面對，而係關乎對全球性嘅影響。」

2005年港姐亞軍陸詩韻同樣覺得可惜：「啱啱先聽到呢個消息，始終呢個係一年一度嘅盛事，之前華姐又宣佈延期，所以真係好可惜，不過而家疫情肆虐，為安全起見都要有呢個決定，希望下年可以搞得大型啲！」

2007年港姐冠軍張嘉兒覺得安全要緊：「知道今年港姐受到疫情影響，公司決定要停辦一屆，真係好可惜，不過安全要緊。下年仲會舉辦，但今年如果搞都會少咗人參加。」

2010年港姐冠軍陳庭欣坦言暫停1年並不可惜：「我個人認為唔會可惜，因為只是暫停一年啊，目前抗疫是全人類最重要的事情，好多其他國際性賽事，如足球界，奧運等都要暫停呢！」

2012年港姐季軍朱千雪笑言每年有追睇，對無綫今年停辦港姐，相信跟疫情有關，她續道：「好多時都可以返去現場睇，所以今年冇就會有啲可惜，不過希望下一年會再做返！我係港姐出身所以都希望公司繼續會有這個傳統。」
-----------------------------
App內1-Click訂閱《蘋果動新聞》
按此了解更多