當年今日
關於我們

敏妮Talk:買舊樓收租好過炒股

蘋果日報 2007/01/05 00:00


噚日同Auntie方食晏,講開契大佬Kenny買樓坐艇單嘢,Auntie方笑住話:「乜你大佬咁大想頭,想做新樓第一批買家?經紀有筍盤都留畀自己啲熟客啦,幾時輪到街外人炒!」
「我已經話咗佢,叫佢做唔到第一批,就做最後一批。個盤真係筍嘅,使乜爭崩頭做第一。」講開買樓,真係好少人有Auntie方咁獨到嘅眼光,佢家住尖沙嘴幾十年,喺嗰區仲有幾層樓收租,每層樓回報起碼5厘。
「Auntie方你買樓咁叻,點解唔去炒吓新樓?」
「儍女,我喺尖沙嘴住咗幾十年,識唔少老街坊同地產經紀,飲早茶同啲街坊老友傾兩句,飲完茶去地產代理坐一陣又傾兩句,乜料都收到啦。再講,我買二手樓,睇到真、睇到夠、再還埋價先買,都唔知幾好;炒新樓要同人爭,層樓都未睇真就話要買,都儍嘅。」
Auntie方最鍾意投資幾十年樓齡嘅大廈,「尖沙嘴係舊區,好多三、四十年樓齡嘅大廈,最好租就係六、七百呎單位,揀嗰啲冇乜裝修、樓價二百零萬嘅,揼十零廿萬裝修,要租萬鬆啲蚊,唔係難事。呢區勝在交通方便,好似金巴利大廈、環海大廈咁,舊式大廈唔同唐樓,有電梯,大堂翻新得好四正,好多空姐同外國人租㗎。」
投資理財人人都有唔同心水,股王A成日叫人學佢炒股,仲話與其將啲錢押喺層樓度,不如拎去炒幾轉。不過,Auntie方就嗤之以鼻,「我唔識買股票,買層樓衰到貼地,都仲有嚿磚頭揸手,買錯咗股票,容乜易一屋牆紙!」
「買樓收租梗係好,但遇到租霸好難搞噃!」
「所以就要搵個可靠嘅經紀,我用緊嗰個跟咗好耐,由佢打工到𠵱家自立門戶都係搵佢,買樓、搵租客、收租都係佢幫我一手包辦。咪俾人賺啲佣囉,佢有筍盤通知你買先,乜都賺番啦。雖然話我住喺呢度幾十年啫,但地產邊夠佢熟。」
http://wanmanli.com/blogs