任達華同太太琦琦、宣萱、徐濠縈等，今晚到西九龍直升機停機坪，為法國超級品牌Dior嘅春夏高級訂做服時裝騷擔任嘉賓。

今晚又有不少美魔女同場，華哥話：「琦琦係我心目中嘅超模魔，個女Ella都係。」問到希望Ella繼承衣缽嗎？華哥就笑笑口話：「唔介意佢做嗰邊（超模），演員就唔好。」呢個時候身旁嘅琦琦就笑指個女嘅演技比爸爸好。

宣萱一身露背裝fit爆現身，佢透露因為要拍瘦身廣告，一個月減咗11磅，一星期做足7天運動及做機，戒咗晚餐，飲營養奶昔，依家目標係瘦多5磅，佢話：「廣告商想我瘦到好似以前咁105磅，即係要多10磅，但我已經唔係廿幾歲，目標係5磅。」

對於近日有位化名偽文豪的無綫前助導出書，數臭無綫兼爆藝人大鑊，宣萱說：「佢哋係辛苦，呢個係本質，要捱更抵夜，我見佢哋最多都係兩星期就走，至於講粗口，相信應該係為件事，係誤會。」

徐濠縈對於老公陳奕迅（Eason）成為萬能key，佢哋就話佢同Eason都有睇，仲話Eason成日搭地鐵，但係環保團體冇叫佢影。另外，阿徐會準備去華盛頓參加馬拉松。