新一屆由民主派主導嘅區議會，多區提出喺地區常設連儂牆，但荃灣區議員劉卓裕喺Facebook發文，指民政事務總署向佢透露，倘若小型項目工程如果包含「連儂」兩個字，就唔能夠提出兼表決。

八方向劉卓裕了解過，佢話星期四（19日）荃灣區議會財政及內務工作小組首次開會，討論各委員會不同地區事務範疇嘅撥款預算，會後佢同民政總署職員閒談時，對方透露每年有約2,000萬撥款嘅小型工程項目，如果動議包括「連儂」兩個字，就唔能夠提交至相關委員會討論同表決。

翻查紀錄，今屆區議會北區、葵青同深水埗等都曾通過動議，要求喺區內增設「連儂牆」，何解荃灣區突然受阻撓？荃灣區議會主席陳琬琛就話，其他地區嘅動議係無約束力動議，但荃灣動議係申請撥款落手搞，批評政府可能「太驚太敏感」，佢已經向民政總署查詢，佢話相信有關指示係上頭發板，所以佢要等民政總署作出交代，先了解所為何事。

陳琬琛強調，唔介意日後改一改名變陣，叫「市民意見收集板」都得，有咗社區連儂牆，畀人表達意見，好過出現警察突然對張貼意見嘅青少年動粗，甚至拘捕嘅情況。

民政總署回覆《蘋果》時就承認「不支持利用地區小型工程計劃興建『連儂牆』的建議」，仲賴呢啲項目會影響社區秩序或者引發衝突嘅問題，唔符合地區小型工程計劃的涵蓋的範圍或目的，仲話起「連儂牆」唔符合現行「地區小型工程計劃」下有關設置告示牌嘅政策，亦有管理和維修的責任、影響社區秩序等問題，唔應該進行。其實特首林鄭月娥嘅存在都影響社區秩序或者引發衝突，咁民政總署又支唔支持佢做特首呢？
-----------------------------
【武漢肺炎】專頁
全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此