新世界中國（917）NAV折讓夠大，預售銷情又理想，趁股價調整，唔怕翻轉。新中最新NAV每股6.55元，現價（2.86元）折讓56%。折讓咁大，無升過龍之餘，兼係近磅內房股當中，折讓最吸引。又新中手頭現金近80億銀，淨借貸比率唔夠30%，財力十足，又可以安然度過阿爺樓市調控期。再講，新中去年度預售內房銷售額45億銀，將會喺本年度入賬，呢個數額，相當於去年度總營業額七成，預售收入個底已經夠厚，加埋本年度持續性樓盤銷售，相信集團2011年度業績，繼續靚仔。
好保守計數，新中2011年度純利仍咁易增長30%，到34億銀，預期PE得4.8倍。呢轉吼住新中調整，喺250日線2.70元兜轉底，博升30%到3.51元，目標價嘅預期PE，真係未有耐上到雙位數。

保華潛在回報20%

保華集團（498）啱啱派咗2011年度（3月年結）上半年成績表，純利翻半番到1.8億銀。又保華最新NAV每股近0.97元，現價（0.32元）折讓高達67%，港口企業當中，保華NAV折讓又係好吸引。保華折讓大，其中一個原因，係股價喺今年中低位橫行，冇點郁過，落後到痹。呢轉短打，博保華衝穿半年橫行頂，上望0.385元，潛在回報率20%，集團亦未有耐上到NAV水位。
錢雋