四川成渝（107）喺滬港通四隻可以買賣嘅公路股當中，仍然係折讓最大，又係AH股折讓最吸引的一隻。仲有，集團喺強勢大股東嘅支持底下，開拓咗多瓣數，唔係區區公路股，快高長大。
滬港通公路股，成渝A股比對香江H股，有溢價近64.5%，其餘三隻深高速（548）A股比H股溢價69%、江蘇寧滬（177）H股則掉轉頭，比A股呈溢價，而最後一隻安徽皖通（995），A股比H股嘅溢價，亦只得36%。成渝H股比A股折讓，仲係好吸引嗰隻。

受惠國策惹憧憬

又成渝最新PB得0.65倍，深高速0.78倍、江蘇寧滬1.85倍、皖通0.93倍，冇喺滬港通list度嘅浙江滬杭甬（576），噚日急升咗11%，PB更加上到兩倍。成渝PB，已經係最抵搞，而喺呢個水位，仲未計集團嚟自四川省眉山市仁壽縣城北新城房產項目嘅潛在肥仔增值（投地每方呎地價360蚊咁大把）。成渝阿媽係四川省交通投資集團，係省屬重要骨幹企業。
再講，剛啱喺四川省人民政府網公佈冇耐，配合打造長江經濟帶立體交通走廊，未來會投資上7,400億元（人仔．下同）喺公路、鐵路同航空等等嘅既立體交通範疇。至於成渝本身，亦由單純嘅公路股，發展到城市運營、工程建設、金融投資，同埋能源以及文化傳媒五大瓣數。今個半年度，成渝嚟自建造合同14.7億元，超越咗公路收入12.83億元，成為主要收入。
諗到嘅係，成渝有強勢股東，再加上強勢嘅經濟發展國策，連埋自身多元瓣數開拓，喺嚟緊嘅日子，快高長大。買成渝，當PB收窄到深高速嘅水位，現價（3.01元）講緊要升40%到4.2港銀，到時，H股比A股講緊仲有輕微折讓。

錢雋
細價股專家
本欄逢周二、三、五刊出