繼續講鄧健泓（Patrick）同陳志雲嘅關係，2010年，陳志雲捲入涉貪醜聞，好多人一沉百踩，令Patrick情緒直落谷低：「去到Steven出事嘅時候，亦都因為咁，我喺無咗啲嘢做，但其實當佢一有問題嘅時候，我都有好努力咁做好自己每一個角色，當時有啲角色我都係超鍾意，當時我諗唔需要陳志雲，我都有角色可以發揮到，我已經好心滿意足。」

Patrick負評如潮，搞到佢無哂自信，唔敢出街，最慘係鍾意做戲嘅佢，突然唔識做戲，情緒極度低落，壓力爆煲，疑似患上抑鬱症，佢話：「我又無睇醫生，但係我係會唔開心，但係有啲病徵係無自信心，好似唔做戲，覺得所有人唔鍾意我，唔敢出場，但係我開始明白，我嘅工作都係為咗生活，由Day1開始我要support我屋企。」

咁點解鄧健泓一度被視為「迷雲黨」之首？全因當年鄧健泓認叫陳志雲做Honey？自此之後，陳志雲=鄧健泓嘅honey，人所共知，仲「流芳百世」，Patrick就想借今次機會再解釋一次呢個千年誤會，佢話：「我每一次澄清都係當我無澄清過，其實係當年我去查小欣個訪問，佢畀咗好多食物列咗出來，叫我揀味精呀！苦瓜、蜜糖、檸檬、水、辣椒，名就逐個畀我，第一個Paco......到李詩韻我無理由公開我戀情，我無理由話佢係蜜糖，我話佢係水，有情飲水飽，每個人都要水，到最後得蜜糖同檸檬，陳志雲我就話佢喺蜜糖，因為蜜糖係有療傷嘅功能，我無嘢做嘅時候佢拉我返來tvb，我生活可以返去正常嘅軌道上面，我可以療傷，佢就畀到個療傷作用我，六叔就係維他命C，完咗方力申打畀我，話我答得好好，之後有報導就話鄧健泓認叫陳志雲做Honey，之後呢樣嘢就留芳百世，大家都覺得我叫佢做乜乜，直至呢個病去到我去茶餐廳叫呢個檸蜜，所以有呢個字我都唔敢講，話檸檬茶加呢個，係一個心理。」

陳志雲畀咗好機會鄧健泓，亦帶畀佢更多苦難同磨練，不變嘅係佢哋嘅兄弟情，結果志雲出庭嘅最後一日，Patrick現身，尾隨大隊步入法庭，佢話：「嗰個係一個緊張時刻，我覺得佢係我親人，佢幫我咁多，你當佢係我阿哥，個日突然有咩閃失佢就要入去，咁我可唔可以支持下佢，見下佢都好！」不過最後又俾人寫佢翻兜，呢次佢好介意：「我唔鍾意呢個唔係事實，接受到舊文來，但係唔好寫到咁欲蓋彌章，我以前唔開心都要食，最嬲係我去又畀人鬧我唔去又畀人鬧，想我點呀！我唔知正唔正確，我放低什麼人講咩，嗰個係朋友，幫過你嘅人，點都要去支持，我唔係行頭位，我好識自己位置喺邊！」