金仔搞核試兼狂射導彈，玩到咁大真係激嬲咗「侵侵」，仲令到習總變咗磨心。其實，依家成個朝鮮半島局勢，就好似玩緊Showhand咁，一場博奕，係咪已經去到最後一張牌？唔知，但我哋睇到嘅係，「侵侵」已經放咗風，話擇咗今個月18日呢個「良辰吉日」做X-DAY，似乎就係要同金仔「晒冷」。事關佢啱啱先開咗另一場賭得更大、賭得更狠嘅牌局，要同整個阿拉伯世界角力，相信有排都唔得閒。

正所謂一念天堂一念地獄，金仔要跟還是冚牌，將決定朝鮮半島會否再度受戰火浸禮嘅命運。事實上，美國從來沒有當金仔係傻佬或者狂人，亦都唔覺得佢一直係唔按常理出牌。今年10月，有美國CIA官員喺一個公開講座中就指出，金仔唔係嗰種肆無忌憚嘅挑釁者，而是「理性的行動派」。即使近日，金仔射導彈射到㷫烚烚，《華爾街日報》引述美國情報同軍方官員消息指，假如美國認為金仔唔夠理性，早就先下手為強，絕對不會好似依家咁勞神請中國幫忙同金仔講數。美國情報官員仲咁話，美國評估過後覺得金仔啲導彈亦唔係亂射，至少就無喺中國舉行十九大同「侵侵」訪問亞洲嗰陣搞事；佢想要嘅係得到世界認可，確保金家王朝屹立不倒，同埋發展北韓經濟。

查實，金仔都係用咗老毛當年個招「寧要核子，不要褲子」，覺得有咗核武，全世界都會忌佢三分，自然有籌碼同你美國討價還價。佢連續多次射導彈，咪好似喺度不停加注，撩起美國把火，但美國又因為中國嘅關係唔敢貿然出兵打佢。亦即係金仔覺得自己hold住中國呢張底牌，美國奈佢唔何。佢睇穿中國唔會睇住個北韓呢個「後花園」失火，而任由美國人長驅直入，殺到埋身。最慘咪北韓個啲已經無啖好食嘅平民百姓囉，依家仲要承受國際制裁嘅苦果，真係雪上加霜。

至於侵侵係咪準備發動「斬首戰」呢？咁你又要唸吓喎，即使爛仔尋仇，都唔會爆響口，話晒俾全世界人知，幾時幾日嚟郁佢？侵侵分明就係借之前爆料嘅日媒同金仔「晒冷」，大佢：你夠膽就繼續射導彈，唔係就「冚牌」，同埋喺呢日之前同佢講和。呢幾日就有消息指，金仔已經離開平壤，走咗去中朝邊界「避風頭」。有報道仲話，嗰度有地道通到中國，方便金仔「着草」。

習總係唔係會繼續盲撐金氏政權呢？喺呢一刻，真係好難講。前幾日《吉林日報》無啦啦刊登成版核戰防護知識及相關資訊；後又有文件洩露，中國當局仲喺中朝邊境設置難民收容點，喺呢個敏感時候，傳出呢啲消息係好唔尋常，搞得唔好，分分鐘引起民眾恐慌，出亂子絕對唔係習總所樂見。呢啲其實係政治訊息，唔係講俾內地人聽，而係想俾金仔同全世界知，中國已經對朝鮮半島爆發戰爭，做咗最壞打算，潛台詞係中國唔一定阻止美國動武。邊個可以排除，中國同美國無私下交易，「做低」金仔？真真假假、虛虛實實，咪係玩Showhand嘅精髓囉。下一步就要睇「文仔」今個月13號訪華，同習總講啲咩。咁樣出牌，金仔應該收到。

花生評論員