上周命中貝迪斯客/和，總算為本欄帶來微利；既然貼半全場順，周日繼續向半全場進軍，荷甲大戰，飛燕諾主場對燕豪芬，博客軍上半場領先，全場就主隊追和甚至反勝。
燕豪芬已經冇歐洲賽包袱，但近期仍令人失望；前仗主場對海倫芬，半場領先2:1之下，竟完場前失波，反輸2:3；上仗作客對川迪，原本以為可以1:0小勝，結果又係完場前一刻俾川迪迫和。今仗客軍有岩拉伯特停賽，奧祖、桑尼維特又因傷缺陣。相反飛燕諾就比季初好番好多，上仗憑湯馬臣入波，2:1反勝NAC，近3場取得2勝1和。呢場大戰我就博燕豪芬半場領先，都有2.6倍；半全場要[客/和]同[客/主]，分別有15倍及28倍。

追馬略卡贏波

配腳方面，愛斯賓奴屬西甲老牌球隊，但今季陷於榜尾，球隊亦行衰運，上仗對維拉利爾，有12碼大好追平機會都射失。馬略卡連續兩仗和波，不過聯賽作客先後擊敗紐文西亞同希杭；對護級球隊有一定把握。戰友戰鬥員A就認為呢場和波格，不過睇近期走勢，馬略卡上半場都入到波，半勝有3.7倍，可以一博。至於意甲有場南部打吡戰，里賈納主場對拿坡里，唔使問阿貴，簡單揀個D就搞掂。波膽方面，就取易不取難，博1:1及2:2兩個波膽，各有5倍及12倍。文：牽牛