周六賽事攤路利爆,不過呢日跑到第五場為止,頭馬卻非大熱即次熱,好有破數據嘅味道。第五場四班千四米,蔡約翰馬房的「詠彩繽紛」因杜滿萊停賽落入羅理雅之手,雖然公認配搭份量削弱咗,但出閘順利,孭住133磅沿途守前列好位,直路羅理雅齋推都彈甩亞軍兩個半身位,取勝姿態輕鬆過上仗好多,四歲新星兩戰保持不敗。
「詠彩繽紛」2.2倍大熱連捷,亦幫羅理雅打破停賽復出後齋缽,佢同時拎到個人近兩個月第一W,應屆悉尼冠軍騎師可謂苦盡甘來。今場二、三名都係半冷門,分別係杜利萊座騎「甜城效應」同韋達座騎「欖球大使」,杜利萊傷癒復出第三戰仲未贏馬,至於第四名則由落飛馬「有綵」攞到,四重彩派一萬五千幾。
「詠彩繽紛」無驚無險再下一城,馬主羅德榮說:「『詠彩繽紛』與上季香港一哩錦標冠軍『精彩日子』同父,質素應不錯,是1400至1600米馬,預計今場加八分左右,希望加分後再有好表現,未來部署全權交由蔡約翰處理。」