呢期香港最紅評論員必定係杜汶澤先生。根據維基百科，杜汶澤一名，來自90年代初一匹上名率極高，叫澤汶渡嘅馬。我老竇當年成日用「好忠心」同「the most honest horse」來形容呢匹馬。而我成日都話，一個人揀乜名好反映佢深層次嘅心態。呢排我見杜汶澤心口貼住「香港」兩字同大陸網民駁火，都好體驗澤汶渡精神。
同一道理，將自己間公司改名為「阿里巴巴」嘅馬雲，一路都係令我覺得，不但要揀個賊名，仲要係個打劫40個行家嘅賊。同馬化騰嘅騰訊（700）對比實在太強烈，因騰訊、騰訊，即「信阿騰」就得，你唔buy我就問自己，IPO時買阿里巴巴同騰訊嘅結果係點？
唔單只得我咁諗，啲覺得阿里唔再來港上市而感可惜嘅人，應睇吓紐約財演寫嘅雞腸文專欄，個個讚我哋有脊椎、有原則，又話唔怪得香港係2008年海嘯唯一冇銀行瓜柴嘅地方。連我都要罕有地讚港交所（388）行政總裁李小加。
不過講開，杜汶澤又知唔知澤汶渡個名點來？當年同老竇入馬房探馬，撞到澤汶渡馬主蒙叔，蒙民德先生。佢話個名來自當時冒起緊，個名叫江澤民嘅領導人，之後將所有字加三點水因水為財，最後「江」想「渡」過，所以就澤汶渡。

諷刺呢？原來呢期最紅兼最大香港主義嘅評論員嘅名，係來自中央最高領導人，真係我哋複雜歷史嘅寫照。不過對於我呢個特區財演，咁係極正常，因多年來如要我揀，江澤民確實係改革開放後我覺得做得最好嘅領導。
如果你唔問啲法輪功嘅人，1989年六四時上海起碼冇開槍，而北京屠城後，佢由中國係pariah變成世貿成員，而拍佢嘅朱鎔基又屢次篤爆信貸泡沫，為國家長遠發展打穩基礎。歷史如果由我寫，我一定話佢兩個遠遠好過十萬又十萬億元胡亂貸款嘅胡錦濤同溫家寶！

孫柏文
獨立股評人
http://facebook.com/shuen
本欄逢周二刊出