【創業起義】移民留低一樣要勇氣(尹思哲)
移民
移民要面對嘅壓力同困難,不足為外人道也,絕對無廣告一面倒咁美好。根本離開同留低,同樣需要付出咁大勇氣。
點樣移民,或係香港人此刻最大迷惘。此刻留港嘅人,除了部份堅決留低,基本上不外乎兩種:無足夠條件走,以及走到但唔捨得,或覺得可以再揼吓波鐘。
所謂無足夠條件,唔一定係講錢或專業技能,有唔少朋友,屋企有老人家,或需要睇醫生,或照顧問題,唔能夠話想走就走。
老友創辦人L,則屬於另一種。佢伴侶喺上市藍籌做高層,半隻腳踏咗入上流社會,唔想放棄多年建立嘅事業,係人之常情,雖然創辦人L自己做足準備,身處世界各地,都可居家工作。為咗兩個細路,佢知道好需要走,偏偏未說服到另一半。
另一位朋友創辦人T,佢檔生意,籌過美金8位數融資,佢算係少數,好捨得放棄香港事業,全身而退由零開始嘅一個。
創辦人T間屋好大,5房獨立屋雙車房,自己初時去到英國,屋未租到學校未揾到,都係住喺創辦人T屋企。唔好睇佢去到英國,生活好似幾寫意,住大屋揸靚車,享盡天倫之樂,過程查實有血有淚。
先係遇人不淑,搞投資移民被呃200萬;為滿足簽證條件,佢搞零售開玩具店,開業無耐,偏又遇上武漢肺炎。仲未計,未來要面對,排華風險嘅與日俱增。
移民要面對嘅壓力同困難,不足為外人道也,絕對無廣告一面倒咁美好。根本離開同留低,同樣需要付出咁大勇氣。重點係,創辦人T已經係最後嗰批,上一代200萬港紙T1 Visa,佢一來簽證已到手,二來煩少錢呢個問題,已經比一般人輕鬆不少。
取而代之嘅Startup同Innovator簽證,雖然對資金要求降低咗,但需有指定機構背書,基本上都係望天打卦。