【新增網民意見】近年劏房愈賣愈有，80後陳生今年5月以約470萬元買入恒地(012)北角尚譽一個163方呎劏房，他接受訪問坦言，社會出現共享空間，既然事情最後發展到買不到樓的人會共享一個空間，那麼163方呎劏房總算是獨立、「起碼係自己地方」，投資收租，把劏房視作未來換樓踏腳石。

與家人居住的陳生不愁無樓住，他表示，買樓當儲錢，心儀地區包括北角、大角嘴及紅磡，一定揀多人租的地方，儲錢當然儲在一些有價值的地區。睇過鰂魚涌君豪峰，因為對正「大酒店」，所以不喜歡。再睇北角君譽峰，周圍高樓大廈，估計單位景觀被遮擋也沒有選擇，最後選擇尚譽。

今年5月，恒地推該項目貨尾單位，陳生斥資約470萬元買入實用163方呎劏房。咁細都買？他回應：「社會出現共享空間，我就諗，既然事情最後發展到買唔到樓嘅人會共享埋一齊，住一間大房。咁自己就唔想，點都要有一個獨立的空間，起碼係自己地方囉！而家買嘅單位，細就梗係細㗎啦。租唔出，自己可以入去住，百零呎都無問題，自己一個人，但如果有伴侶，咁梗系住唔過。再者，我點都要3年後先可以賣，3年後係點都好，我起碼叫儲咗一舊錢，呢一層樓都叫供咗3年啦，我咪攞呢層樓去換一層大啲㗎囉。到時再諗換樓，舒服啲，大啲咁囉。每個人都想買大啲，買好啲㗎啦！二手都諗過，但太舊，又要花錢裝修。」

接受訪問當天，中美貿易戰尚未有暫時停火90日協議，正值樓市轉勢之際，他坦言：「後悔就無，預計過有機會冧。冧咗最壞嘅打算，我諗都供到嘅時候，就無乜點理。當然跌，梗係唔開心，但買樓唔係睇半年、一年、兩年，是3至5年的投資，3年同5年後係咩環境，無人知！好啦，當真是跌2年，第2年反彈，結果可能是一樣。心情梗係差啲啦，但是都無計㗎，都買咗囉，係咪！我當係月供股票，例如騰訊(700)之前400幾蚊買，如果逐啲逐啲咁賣，成本會低返囉，大致上我是咁長的投資去睇。」他補充：「有陣時，我諗緊如果5月無買，而家仲夠唔夠膽入呢，其實未必。行咗第一步，再望一望係咩境況先啦，我都想試一試，睇下點囉，400幾萬話多唔多，話少唔少，所以想試下囉！」

目前他將劏房放租叫租1.5萬元，扣除管理費，回報率約3.6厘。世紀21日昇地產執行董事黃文龍表示，項目現有約27個單位放租，其中163方呎單位尚未有租賃成交，同類單位普遍叫租1.5萬元。早前一個高層D室，實用167方呎，月租1.55萬元，呎租92.8元，呎租創項目新高。另外，高層B室，實用207方呎，月租1.6萬元，呎租約77.3元，原業主623.3萬元買入，租金回報率近3.1厘。

資深驗樓師詹濟南「詹sir」驗收上述單位，以為空間少就少出事，點知要貼膠的地方漏膠、有膠的地方爛膠，詹sir不敢直言「無膠用」，總之扣分最嚴重就是膠，門及潔具與來去水評分不合格，拖累總分78分，屬於中間浮沉的水平。

入屋前就指出大門門框頂未做修口，予令交樓倉卒之感。廳房合一的四方空間才8.366呎乘7.244呎，面積逾60方呎，擺完床後空間剩無幾。四方空間兩邊大窗，僅一幅牆身，詹Sir企定定幾乎不移玉步已敲勻油漆批盪，如此少面積，卻仍然被詹sir敲到窗邊底一處批盪空鼓，但他認為，批盪空鼓面積細於1平方呎算合格，至少10年或以上才會剝落，就算要求執修，也未必獲發展商及承建商受理，除非在附近位置進行裝修工程，或會令問題惡化。

全屋才23塊地磚，理應無空鼓崩花破裂。面積僅20方呎的廁所未至於細到馬桶坐不到，廁所選用趟門，但閂門踎底打開洗手盆，仍被櫃門頂心口。同時發現櫃面崩裂，建議更換。洗手盆水喉無漏水，但有一個水管喉碼爛掉。詹sir指，企缸玻璃膠邊，「邊過咁搞鬼呀，特登割鬼爛條玻璃膠嘅」，好彩不是迎水那一面，否則有機會滲水。舉頭望天花，多處與牆身、窗框邊及玻璃的接駁位應該有膠而漏玻璃膠，「（假天花）周圍啲頂修得唔靚…（有何影響？）係唔係靚啫！」

淋浴間一邊玻璃窗原本貼有磨砂保障私隱，業主稱發展商交樓時發現該磨砂貼刮花，已除去並承諾更換。不過裝修工人為廁所框噴漆時，不小心噴到地磚也有噴漆痕跡。廁所趟門撞門框，推拉之間已聽到撞框聲，詹sir建議調校趟門路軌，以免日後「一個唔覺意撞爆玻璃」。他總結，交樓工種有兩項不合格，分別是門、潔具及來去水，其中後者受累於玻璃膠問題，「成個單位扣分最嚴重就是膠，單係呢項已扣7分」，令單位總分至78分，評分在近年劏房盤而言，屬於中間浮沉的水平。恒地發言人回應，上述單位所有執修項目已完成修繕。

節錄部份網民留言︰
Anthony Tse︰3年後檔儲到舊錢可以樓換樓，邏輯上正確，但入貨時機錯誤及買錯樓房種類，相信3年後嚟層樓既價值隨時大跌6成，到時周街都係平靚正荀貨，買家又點會吼你層樓呢？再者，當經濟衰退時，所謂既租金回報隨時係負數，租客隨時會因為自身環境改變而變成租霸，莫講收租，可能連屋內既裝修都分分鐘被破壞。得不償失。一句講晒，買樓唔單靠景觀及周邊環境是否能升值，而亦要因交通、是否大型樓盤 及面積。將心比心唸吓，自己會唔會用萬幾蚊租個163呎既單位嚟住呢？80後既買家，你今次可能好大機會會變做“負資產業主”喇。

Wing Ching Lam︰真係祝你好運！你亦要多謝特區正苦幫你上車！

Aska Wong︰我唔係黑心"但呢位80後陳生︰疊埋心水 等定去遊行叫特首下台啦！

Sam Tong︰回報率3.6厘？你估淨係交管理費無其他開支？除左差响、地租、一個月既佣金仲有裝修既折舊同維修

Lo Ban Law︰去元朗，已經可以買間400幾呎，正正常常給人住既樓！點解要困自己係個籠入面？

記者：陳家雄
攝影：何耀勤

investMAN
For People of Style & Substance
掌握理財智慧 感受生活品味
http://facebook.com/investMAN.hk