今次演唱會劉浩龍講明冇嘉賓環節,所以一定唔會見到容祖兒:「相信入場嘅觀眾都唔介意睇我耐啲。我唔會想將啲舊歌改得太犀利,希望觀眾一聽到首歌嘅前奏就有番嗰份回憶喺度。」今年除咗做演唱會,亦會炮製新歌,喺過程中搵番好多初出道做歌手嘅回憶,劉浩龍話:「所以我同公司講,今年希望全力做音樂工作,雖然中間我要去拍電影,但我都好希望年尾可以出席頒獎禮。」 今次選址旺角麥花臣,劉浩龍有冇諗過去紅館?佢話:「其實冇,我份人一向都好知道自己位置,我唔想人哋話『好啦,還你心願幫你開一場。』我希望大家真係滿意我演出,有口碑、有成績我先至會再考慮。」
撰文:馮仁昭